മിക്ക വീടുകളിലും കാണും ഒരു മണി പ്ലാന്റെങ്കിലും. എളുപ്പത്തിൽ, അധികം പരിചരണമില്ലാതെ വളരുന്ന ഒന്നാണ് എന്നത് തന്നെയാണ് ഇതിനെ പ്രിയപ്പെട്ടതാക്കുന്നത്.

എന്നാൽ, ചിലപ്പോൾ അവയും വാടിപ്പോവുകയും നശിച്ചുപോവുകയും ചെയ്തേക്കാം. മണിപ്ലാന്റുകൾ നശിച്ചു പോകാതിരിക്കാൻ ചില ചെറിയ കാര്യങ്ങൾ ശ്രദ്ധിച്ചാൽ മതി. 

വെള്ളത്തിലും മണ്ണിലും മണി പ്ലാന്റ് വളർത്തുന്നവരുണ്ട്. വെള്ളത്തിൽ വളർത്തുമ്പോൾ ആഴ്ചയിലൊരിക്കലെങ്കിലും വെള്ളം മാറ്റാൻ ശ്രദ്ധിക്കാം. പൊടിയുണ്ടെങ്കില്‍ ഇലകള്‍ തുടച്ചുകൊടുക്കാം.

പ്ലാന്റിന്റെ ഇലകൾക്ക് മഞ്ഞനിറം കാണുന്നുണ്ടെങ്കിൽ അമിതമായി വെള്ളം നനച്ചാതാവാം കാരണം. അതിനാൽ, നല്ല ഡ്രെയിനേജുള്ള പാത്രമെടുക്കാം. അതുപോലെ ആവശ്യത്തിന് മാത്രം നനച്ചുകൊടുക്കാം. 

നേരിട്ടുള്ള സൂര്യപ്രകാശത്തിന് പകരം പരോക്ഷമായിട്ടുള്ള സൂര്യപ്രകാശമാണ് ഉത്തമം. തീരെ വെയിൽ കിട്ടാതെയിരിക്കരുത്. നേരിട്ടുള്ള വെയിൽ ഒഴിവാക്കിയാൽ മതി. 

തീരെ ആരോ​ഗ്യമില്ലാത്തതായി മാറുന്നു എന്ന് തോന്നിയാൽ ചെടി മാറ്റി നടുന്നതും പരി​ഗണിക്കാവുന്നതാണ്. വെള്ളം കെട്ടിക്കിടക്കരുത് എന്നത് പോലെ തന്നെ മണ്ണ് വരണ്ടുപോകാതെയും ശ്ര​ദ്ധിക്കണം. 

അതുപോലെ ചെടിയുടെ വേരുകൾ ചീഞ്ഞുപോകുന്നതായി തോന്നിയാൽ അപ്പോൾ തന്നെ വെള്ളം കെട്ടിക്കിടക്കുന്നുണ്ടോ എന്ന് പരിശോധിക്കുകയും ഉണ്ടെങ്കിൽ അത് പരിഹരിക്കുകയും വേണം.